Tónaskald í útlegd

Tónaskald í útlegd er heitið á útvarpssending, ið var send í tveimum pørtum á páskum. Sendingin kann  nú stroymast eftir tørvi. Knút Háberg Eysturstein og Uni Arge spæla og skifta orð um løg hjá Regini Dahl. 

Promo teksturin til sendingarnar:

Páskadag kl 13.10 og 2. páskadag kl. 13.10 verður sendingin "Tónaskald í útlegd" at hoyra í útvarpinum. Í sendingini spæla Knút Háberg Eysturstein og Uni Arge løg hjá tónaskaldinum Regini Dahl.

Regin Dahl varð føddur í 1918 og doyði í 2007. Hann vaks upp í Sandagerði og fór í 1934 niður á Sorø Akademi at taka studentsprógv, sum hann fekk í 1937. Hetta sama árið gav hann út sítt fyrsta yrkingasavn, og longu tá var hann farin at skriva løg.

Regin Dahl skrivaði hundraðtals løg til føroyskar, norðurlendskar, týskar, latínskar og enskar yrkingar, og í fleiri umførum í 1970'unum vórðu hesi løgini tikin upp. Upptøkurnar eru savnaðar á útgávuni Atlantsløg frá 1997.

Í 2019 kom út bókin Heimurin, ið hvarv – útlagna sangtónaskaldið Regin Dahl og føroyska tjóðin eftir Knút Háberg Eysturstein.

Við síni stóru vitan leiðir Knút okkum ígjøgnum lagasmíðið hjá Regini Dahl, serliga til yrkingar hjá Hans Andriasi og Janusi Djurhuus, Jóannesi Patursson og Jákupi Dahl. Í sendingini hoyra vit Regin sjálvan og ymisk onnur syngja kendar og minnir kendar sangir, sum Regin eigur løgini til.

Sí annars aðrar bloggar um Regin Dahl v.m. her.