 |
| Trentemøller á G! 2025. Egin mynd. |
Um Nusantara Beat var millum størstu yvirraskilsi á ársins G! Festival, var konsertin við Trentemøller uttan iva tann, ið eg gleddi meg mest til. Tað eru skjótt 20 ár síðani ein byrjaði at fylgja við virkseminum hjá tónleikaranum, framleiðaranum og diskaranum Trentemøller. Tá tankin um Undirbeat átakið føddist í Grundini á G! Festival í 2007, var Trentemøller eyðsæð partur av soundtrackinum saman við nógvum øðrum, einamest elektroniskum, dansitónleiki.
Plátur sum The Last Resort (2006), The Trentemøller Chronicles (2007) og Into The Great Wide Yonder (2010) hava leingi átt innivist í plátusavninum. Vit minnast eisini við gleði aftur á konsertir og framførslur - eitt nú stórslignu totalupplivingina, tá Trentemøller, dansarar og tónleikarar hertóku Orange scene á Roskilde í 2009, eins og gjøgnumførda DJ settið, ið maðurin spældi, tá legendarisku Suicide framførdu á Statens Museum for Kunst í 2010.
 |
| Trentemøller á G! Festival. Mynd: Anine Desire, G! Festival. |
Vónirnar vóru tí høgar undan konsertini, og hon skuffaði ikki. Trentemøller, sum í dag er ein bólkur, leveraði eina konsert, ið var krúnan á einum frammanundan krútsterkum hóskvøldi, har m.a. Vavað, Tunghoyrt, DakhaBrakha og Hatari eisini gjørdu sítt til at styrkja um heildarupplivingina. Ein vøkur og rúnarbindandi ferð gjøgnum frálíku diskografiina hjá Anders Trentemøller, ið skrivaði seg í søgubøkurnar sum ein av teimum heilt serstøku G! framførslunum.
Lagt var frá landi við avbera vakra shoegaze lagnum 'I Give My Tears' av plátuni Dreamweaver (2024), og ljóðmyndin var perfekt frá byrjan. Ein hevði nærum hug at klípa seg í armin, tí tað er bestemt ikki gerandiskostur at hoyra so vakurt avgreiddan shoegaze musikk á Gøtusandi. Tankarnir leitaðu sær aftur til legendarisku konsertina hjá norska noise rock kollektivinum Serena Maneesh í 2007, og til Clickhaze í 2003 (ein kundi eisini nevnt okkurt, har ein sjálvur var við, men sjálvrósið lata vit liggja hesuferð).
 |
| Ein droymandi løta á Sandinum. Mynd: Alessio Mesiano, G! Festival. |
Hildið var fram við sveimandi post-punk lagnum 'Behind My Eyes', somuleiðis av Dreamweaver (2024), og eftir hetta fingu vit krautrock inspireraða instrumentala plettskotið 'Still On Fire' av plátuni Lost frá 2013. Eingin ivi um, at júst henda plátan sementeraði nýggju kósina hjá Trentemøller. Fyrstu árini flirtaði hann dúgliga við elektroniska dance rákið, og remixini fyri eitt nú Röyksopp og The Knife í sein-00'unum vóru við til at gera Trentemøller til eitt navn. Upprunin sum indie tónleikari í 90'unum fornoktaði seg tó ikki, og alskurin til "hondspældan tónleik" vann í longdini.
Tá EDM rákið tók dik á seg fyrst í 2010-unum var greitt, at Trentemøller vildi nakað heilt annað við sínum tónleiki. Á Lost var ein røð av háttvirdum indie sangarum og tónleikarum við (Mimi Parker, sála, úr Low, Jana Hunter úr Lower Dens, Kazu Makino úr Blonde Redhead, Sune Rose Wagner úr The Raveonettes o.s.fr.). Greitt var, at Trentemøller vildi fegin spæla konsertir og ikki bara vera diskari (DJ). Hesa leið hevur hann hildið fast við síðani.
 |
| Hondspælt og huglagsríkt. Trentemøller á G! 2025. Egin mynd. |
Í fjør kom sjeynda útgávan, hin áðurnevnda Dreamweaver (2024), sum hugtekur við sannførandi Twin Peaks-hugløgum og íslendsku songkvinnuni Dísa Jakobs á odda. Tað var eisini júst heitislagið haðani, 'Dreamweavers', ið var næst á skrá. Avbera vakurt! Eitt serstakliga væl skrivað og samansett lag. Áðurnevnda Dísa Jakobs var tó ikki við á ferðini í Føroyum. Í hennara stað var danska indie sangarinnan Emma Acs komin at taka sær av vokali, percussion og tangentum. Sigast má, at Acs stóð seg væl í heildini, og hon túrar eisini við bólkinum á konsertum í Evropa í løtuni.
 |
| Emma Acs á palli við Trentemøller. Mynd: Anine Desire, G! Festival. |
Tónleikararnir í bólkinum vóru sostatt Anders Trentemøller á synth og tangentar, Emma Acs á vokal, percussion og synth, Silas Tinglef á trummur, Brian Batz á gittara og Jacob Haubjerg á bass og vokal. Hin seinast nevndi, Jacob Haubjerg, átti eisini tørn sum vokalistur á lagnum 'Deceive', ið Sune Rose Wagner syngur á plátuversiónini á Lost (2013). Øll komu væl frá uppgávuni. Ein kundi bara leggja høvdið afturá, og njóta hvussu rútmur, synthar og gittarar sveimaðu so fagurliga í tokutu føroysku summarnáttini.
 |
| Anders Trentemøller til vinstru, Jacob Haubjerg til høgru. Mynd: Anine Desire, G! Festival. |
 |
| Trentemøller á G! Festival. Mynd: Anine Desire, G! Festival. |
Til endans fingu vit so nýklassikarar av debutini The Last Resort (2006), eitt nú minimalistiska og dub kenda 'Vamp', har einans Trentemøller og rútmusektiónin Tinglef og Haubjerg jammaðu saman á pallinum, umframt stórhittið 'Moan', har gittarleikarin Brian Batz innarbeiddi gittar riffið úr 'Lullaby' hjá The Cure í einum væl eydnaðum live mashup. Aðrastaðni í konsertini var eisini ein greið tilsiping til 'Blue Monday' hjá New Order. Sigast má, at Trentemøller ikki smæðist við sínar tilsipingar. Maðurin er m.a. svorin The Cure fjeppari, og hann eigur eisini eitt av frægu remixunum á nýggju The Cure remix plátuni Mixes of A Lost World ('And Nothing Is Forever (Trentemøller rework)'.
Vit fingu eisini eitt regulert coverlag við á vegnum, nevniliga elektrofiseraðu Trentemøller tulkingina av 'Cops On Our Tail' hjá noise rock bólkinum The Raveonettes, upprunaliga av somuleiðis framúr góðu Whip It On plátuni frá 2002. Í samband við 20 ára jubileumsútgávuna í 2022 bíløgdu The Raveonettes (Sune Rose Wagner og Sharin Foo) eina røð av tulkingum av løgunum á hesi plátuni. M.a. gjørdi okkara egna Brimheim eina tulking av 'Veronica Fever'. Við 'Cops On Our Tail' fingu vit ein eksplosivan enda á høvuðssettinum.
 |
| Trentemøller á G! Festival. F.v. Batz, Acs, Trentemøller, Haubjerg og Tinglef. Egin mynd. |
Tíðin stendur tó ikki í stað, og vit fingu also bert nøkur sekund úr umrødda remix. Eitt lítið hint úr tí, sum einaferð var. Trentemøller er farin víðari á síni leið, hann hvílir ikki á nøkrum lavrberjabløðum, men brýtur heldur upp úr nýggjum. Gott! Nú eisini sum framúr góður live bólkur. Hattin av fyri tí, ogt takk fyri serstøku løtuna á Gøtusandi.
Sí settlista og live framførslu á KEXP í februar 2025 niðanfyri!
TRENTEMØLLER Á G! 2025
Comments
Post a Comment